२७ असार, २०८१
काठमाडौ\ आजका लागि तोकिएको राष्ट्रिय सभाको बैठक अचानक स्थगित गरिएकोमा प्रमुख चार दलले आपत्ती जनाएका छन् ।
राष्ट्रिय सभाको कार्यव्यवस्था परामर्श समितिको बैठकमा अधिकांस सदस्यहरुको असहमतिको बावजूद पनि अचानक राष्ट्रिय सभाको बैठक स्थगित भएको भन्दै उनीहरुले गम्भिर ध्यान आकर्षण भएको जनाएका छन् । नेकपा (एमाले)का प्रमुख सचेतक भगवती न्यौपाने, नेपाली कांग्रेसका प्रमुख सचतेक कृष्ण बहादुर रोकाय, जनता समाजवादी पार्टीका संसदीय दलका नेता मृगेन्द्र कुमार सिंह र लोकतान्त्रिक समाजवादी पार्टी नेपालका संसदीय दलका नेता शेखरकुमार सिंहले संयुक्त विज्ञप्ति निकालेर आपत्ती जनाएका हुन् ।
चार दलको संयुक्त विज्ञप्तिमा भनिएको छ, ‘आषाढ २३ गते नै नियमित कार्यसूचिमा आएका आर्थिक विद्येयक २०८१, राष्ट्र ऋण उठाउने विद्येयक २०८१, भन्सार महशुल सम्बन्धि विद्येयक २०८१ लाई पारित गर्नु पर्नेमा अर्थ मन्त्रीको गलत मनसायका कारण आज २७ गते तोकिएको राष्ट्रिय सभाको बैठकमा मा. अर्थ मन्त्रीको अनुपस्थिती भन्दै राष्ट्रिय सभाको अध्यक्षले राष्ट्रिय सभामा प्रतिनिधित्व गर्ने हामि तपशिलका दलहरुको असहमतिका बाबजूद पनि बैठक स्थगित गर्नु भएको छ ।’
अर्थमन्त्री पुनले आयकर ऐन २०५८ को दफा ५७ को उपदफा १ मा प्रतिबन्धात्मक प्राबधान राखि आर्थिक विद्येयक २०८१ को दफा ३६ को उपदफा ६ मा मुलुकलाई गम्भिर असर पार्ने गरी अरबौंको राजश्व छली हुने प्रावधान राखेको र राष्ट्रिय सभाबाट उक्त प्रतिबन्धात्मक वाक्यांश हटाई पहिलेकै व्यवस्था कायम रहने गरि संशोधन सुझाव राखेकोमा मन्त्रीले नीतिगत भ्रष्टाचार गर्न लागेको पोल खुल्ने भएपछि मन्त्री बैठकमा नै नआउने र आर्थिक वर्ष २०८१ को बजेट सँग सम्बन्धित आश्रित विद्येयकहरु फेल गर्ने र नेपालको संविधानको धारा १११ र राष्ट्रिय सभा नियमावलीको व्यवस्था अनुसार राष्ट्रिय सभामा छलफल गर्न नदिने र १५ दिन पछि प्रतिनीधिसभा बाट स्वत पारित गराई आफ्नो अभिष्ट पुरा गर्ने उद्धेश्य रहेको उनीहरुले तर्क गरेका छन् ।
यसबाट राष्ट्रिय सभाले विद्येयकहरुमा आफ्नो सुझाव र संशोधन राख्न पाउने संवैधानिक र कानूनी अधिकार समेत हनन् भएको चार दलको ठहर छ । यस प्रकारको क्रियाकलाप प्रति गम्भिर असहमति रहेको हुँदा यस्तो गैह्र जिम्मेवार र गैह्र राजनीतिक क्रियाकलापको घोर भत्र्सना गरिएको विज्ञप्तिमा उल्लेख छ ।