१२ चैत, २०८१
काठमाडौ, भौतिक पूर्वाधार तथा यातायात मन्त्री देवेन्द्र दाहालले सार्वजनिक यातायात व्यवस्थापन दक्षिण एशियाको साझा सरोकार रहेको बताउनु भएको छ ।
सोमबार ललितपुरमा शुरु भएको दक्षिण एशियाली यातायात सम्मेलनको उद्घाटनका क्रममा उहाँले दक्षिण एसियामा दिगो, कुशल र समावेशी भविष्यको लागि सार्वजनिक यातायातलाई रूपान्तरण गर्न जरुरी रहेको बताउनुभयो । दक्षिण एसियामा सार्वजनिक यातायात सञ्चालनलाई रूपान्तरण गर्ने मुद्दा एकदमै महत्वपूर्ण रहेको उल्लेख गर्दै उहाँले सार्वजनिक यातायात आम जनतासँग प्रत्यक्ष रूपमा सम्बन्धित विषय भएको पनि बताउनुभयो । सार्वजनिक यातायात गुणस्तरीय, आरामदायी, सुरक्षित, दिगो र वातावरणमैत्री हुनु पर्ने मन्त्री दाहालको भनाई थियो ।
‘हाल, दिगो र वातावरणमैत्री यातायातको मुद्दा विश्वभर साझा मुद्दाको रूपमा उठाइएको छ’ मन्त्री दाहालले भन्नुभयो, ‘बढ्दो जनसंख्याका कारण सार्वजनिक यातायातको प्रयोग बढ्दै गएको छ । केही देशहरूमा, ट्राफिक जामले जताततै दैनिक तालिकालाई असर गरेको छ, जसले गर्दा उनीहरू काम, महत्वपूर्ण बैठक वा अन्य कार्यक्रमहरू छुटेका छन् ।’
ट्राफिक जामको समस्या विश्वका लगभग सबै शहरी सडकहरूमा समस्या बनेको भन्दै उहाँले विश्वका धेरै शहरहरूमा सार्वजनिक बसहरूको लागि समर्पित दु्रत लेनको अवधारणा लागू गरिएको छ साथै नेपालको काठमांडौमा पनि उक्त अबधारण लागु गरिएको जनाउनुभयो ।
हामी मन्त्रिपरिषद्बाट राष्ट्रिय यातायात नीति पारित गर्ने र तुरुन्तै जारी गर्ने तयारी गरिरहेको भन्दै मन्त्री दाहालले सुरक्षित यात्राको लागि सडक सुरक्षा कानूनको तयारीलाई अन्तिम रूप दिएको जनाउनुभयो । यसै गरि सार्वजनिक यातायातलाई नियमन गर्ने विधेयकको अन्तिम तयारी भइरहेको, नयाँ सडक निर्माण गर्दा सडक सुरक्षा प्रावधानहरूलाई कडाइका साथ लागू गरिरहेका तथा सार्वजनिक यातायातलाई छिटो, प्रविधिगत रूपमा उन्नत र अपाङ्गमैत्री बनाईने समेत जनाउनुभयो ।
साझा यातायातको संयोजनमा भएको ‘ट्रान्सफर्मिङ् पव्लिक ट्रान्सपोर्टेशन ईन साउथ एशिया’ सम्मेलनमा सार्क एवम् चीनका विभिन्न सरोकारवाला एवम् विज्ञहरुको सहभागीता रहेको साझा यातायातका महाप्रवन्धक महेन्द्रराज पाण्डेले जानकारी दिनुभयो ।
सार्वजनिक यातायात व्यवस्थापन दक्षिण एशियाको साझा सरोकार : मन्त्री दाहाल – ब्यानरनेपाल :: Banner Nepal