काठमाडौ, २७ फागुन – भौतिक पूर्वाधार तथा यातायात मन्त्री देवेन्द्र दाहालले अमेरिकाको वासिङ्टन डिसीमा आयोजित ‘ट्रान्सफर्मीङ् ट्रान्सपोर्टेशन २०२५’ कार्यक्रमलाई सम्बोधन गरेका छन्।
मन्त्री दाहालले नेपालको भौगोलिक विविधता र पर्यावरणीय दृष्टिकोणको महत्वलाई औंल्याउँदै, नेपालको सडक सञ्जाल र यातायात विस्तारमा सरकारको प्राथमिकता स्पष्ट गरे। नेपाल सानो भौगोलिक आकार भएको देश भए तापनि, यहाँको पर्यावरणीय विविधता र भौगोलिक अवस्थालाई ध्यानमा राखेर यातायात नीति अघि बढाइएको उनले बताए।
सडक सञ्जालको सुधार र विकासमा सरकारको ध्यान केन्द्रित रहेको बताउँदै उनले, ग्रामीण क्षेत्रमा सडक सेवा विस्तार, सवारी साधनको लागत न्यूनतम राख्ने, र छोटा सडक सञ्जालको स्तरोन्नति गर्ने विषयमा योजनाहरू प्रस्तुत गरे।
मन्त्री दाहालले नेपालमा यातायात पूर्वाधारलाई दिगो, किफायती र समावेशी बनाउने उद्देश्यले सरकार काम गर्दै आएको उल्लेख गरे। विशेषगरी, बायोइन्जिनियरिङ र स्थानीय प्रविधि मार्फत सडक सञ्जालको विस्तार र विकासमा ध्यान दिइएको छ।
यसका साथै, नेपाल सरकारले सडक सञ्जाल मर्मतसम्भारको प्रक्रिया सुधार गर्दै, स्वचालित प्रणालीको विकास र स्थानीय स्रोत साधनको प्रयोगमा जोड दिएको मन्त्री दाहालको भनाइ थियो।
‘ट्रान्सफर्मीङ् ट्रान्सपोर्टेशन २०२५’ कार्यक्रमको भागको रूपमा, मन्त्री दाहालको नेतृत्वमा गएको टोली यातायात, रोजगारी, आर्थिक वृद्धी र खाद्य सुरक्षा जस्ता महत्वपूर्ण विषयमा छलफलमा भाग लिने छ।
Janawatch | मन्त्री दाहालको वासिङ्टन डिसीमा ‘यातायात मार्फत रुपान्तरण’ विषयक सम्बोधन – Janawatch