फागुन १६, २०८१ शुक्रबार
नुवाकोट : यातायातको पहुँच वृद्धिका लागि नुवाकोटको त्रिशूली नदीमाथि दुई वटा पुल निर्माण गरिएको छ। दुई छुट्टाछुट्टै स्थानमा निर्माण गरिएको पक्की मोटरेवल पुलको शुक्रवार उद्घाटन गरिएको छ।
विदुर नगरपालिका-४ सिमचौर र विदुर १२ गौरीवेशी जोड्ने त्रिशूली नदीमाथि निर्मित पुल र विदुर १ ढुंगे र सोही वडाको त्रिशूलीबजार जोड्ने त्रिशूली नदीमाथि निर्मित अर्को पुलको भौतिक पूर्वाधार तथा यातायात मन्त्री देवेन्द्र दाहालले उद्घाटन गरेका हुन्। पुलको उद्घाटन गर्दै मन्त्री दाहालले वर्तमान सरकारले विकासका कार्यलाई प्राथमिकता दिएको र विकासका गतिविधिहरू बढिरहेको बताए।
मन्त्री दाहालले सर्वसाधारणको प्रगति र विकास भनेकै सडक तथा पुल भएको हुँदा अहिलेको सरकारले जनतामाझ देखिने र प्रभावकारी रुपमा कार्य गरेको बताए। उनले सरकारले गरेको जनपक्षिय कार्यमा सत्तापक्ष तथा प्रतिपक्ष दल सबैले सहयोग पुर्याउनुपर्ने समेत बताए।
भौतिक पूर्वाधार तथा यातायात मन्त्रालयअन्तर्गत सडक विभाग, पुल सेक्टर काठमाडौंमार्फत विदुर नपा ४ सिमचौर र विदुर १२ गौरीवेशी जोड्ने त्रिशूली नदीमाथि निर्मित ११ मिटर चौडाइ र एकसय मिटर लम्बाइको दुई वटा स्पान रहेको पुल कुल १५ करोड ११ लाख ३६ हजार ६३ रुपैयाँको लागतमा निर्माण गरिएको हो।
यस्तै, विदुर १ ढुंगे र सोही वडाको त्रिशूलीबजार जोड्ने त्रिशूली नदीमाथि निर्मित ११ मिटर चौडाइ र ६० मिटर लम्बाइ हो एक स्पान रहेको पुल नौ करोड चारलाख एकहजार दुई सय रुपैयाँको लागत योजनामा निर्माण सम्पन्न गरिएको सडक विभागका महानिर्देशक रामहरि पोखरेलले जानकारी दिए।
दुवै पुल निर्माण सम्पन्न भएपछि काठमाडौंबाट नुवाकोट हुँदै धादिङ जानसमेत सहज भएको सडक डिभिजन नुवाकोटले जनाएको छ। विदुर नपा ४ सिमचौर र विदुर १२ गौरीवेशी जोड्ने पक्की पुल तोकिएको अवधि भन्दा दुई महिना अगावै सम्पन्न गरेको कारण भौतिक पूर्वाधार तथा यातायात मन्त्रालयले जय विष्णु निर्माण सेवालाई प्रशंसा पत्रद्वारा सम्मानित गरेको छ।
नवनिर्मित दुई वटै पुलबाट साना र ठूला गरी दैनिक हजारौं यातायातका साधनहरू आवतजावत गर्ने विदुर नपाका मेयर राजन श्रेष्ठले बताए। उनले नुवाकोटको विकासमा महत्वपूर्ण रहेको मध्यपहाडी सडकमार्गले सर्वसाधारणको जीवनस्तर परिवर्तन भइरहेको समेत बताए।
कार्यक्रममा प्रतिनिधि सभा सदस्य विमला सुवेदी, बागमती प्रदेश सभाका पूर्वमन्त्री केशवराज पाण्डे, प्रदेश सभा सदस्य रामप्रसाद ढुंगाना, पूर्व सांसद नारायणप्रसाद खतिवडा, पूर्व प्रदेश सभा सदस्य हिरानाथ खतिवडा, जिल्ला समन्वय समितिका प्रमुख रजिन्द्रविक्रमसिंह ठकुरी, भौतिक पूर्वाधार तथा यातायात मन्त्रालयलका सचिव इन्जिनियर केशवकुमार शर्मालगायतले तीनै तहको सरकारले सहकार्य गरेर विकासका कार्य पूरा गर्नुपर्नेमा जोड दिए।
कार्यक्रममा नुवाकोटमा निर्माणाधीन त्रिदेशीय सडकमार्ग अन्र्तगतको गल्छी-विदु-रसुवागढी, मध्यपहाडी लोकमार्ग, पासाङल्हामु सडकमार्गको रानीपौवा-पिपलटार सडकखण्डलगायतका सडकखण्डको निर्माण समयमै सकेर जनताको विकासको आवश्यकतालाई पुरा गर्नुपर्नेमा जोड दिइएको छ।