२० असोज, २०८०
काठमाडौ, नेकपा एमाले स्थानीय तह विभागका प्रमुख देवेन्द्र दाहालले स्थानीय तहलाई बलियो बनाएर मात्र समाजवादको आधार तयार पार्न सकिने बताउनु भएको छ । शनिवार कविता ढुंगानाद्वारा लिखित ‘स्थानीय सरकार अपेक्षा र अवस्था’ नामक पुस्तक विमोचन कार्यक्रममा उहाँले संविधानको प्रभावकारी कार्यान्वयन मार्फत समाजवादको आधार तयार पार्नु पर्ने समेत बताउनु भयो ।
एमालेको राष्ट्रिय सभा संसदीय दलका नेता समेत रहनु भएका नेता दाहालले एमाले, कांग्रेस र माओवादी लगायतका मुख्य दललहरु जिम्मेवार भएर संघियतालाई बलियो बनाउनु पर्नेमा जोड दिनुभयो । स्थानीय तह संवैधानिक रुपमा व्यवस्था गरिएका तीन तहका सरकार मध्ये सवै भन्दा आधारभूत तहको सरकार भएकाले यसलाई जनमूखी बनाउन सक्नु पर्ने नेता दाहालको भनाई थियो ।
राष्ट्रिय सभा मार्फत विभिन्न स्थानीय तहहरुको अनुगमन र अवलोकन गर्दा स्थानीय न्यायीक समिति मार्फत भएका निर्णयहरु कार्यान्वयनमा समस्या पाईएको समेत उहाँले बताउनुभयो । कतिपय निर्णय तथा फैसलाहरु कार्यान्वयन गर्दा सुरक्षाकर्मीको सहयोग आवश्यक हुने तथा प्रहरीले आफुहरुको क्षेत्राधिकार नभएको बताउने गरेकाले त्यस्ता फैसलाहरु कार्यान्वयन नहुने गरेको पाईएको दहालले बताउनुभयो ।
उहाँले भन्नुभयो,‘कतिपय अवस्थामा तिनै तहका सरकार र तिनका अंगहरु विचमा समन्वय र सहकार्य जरुरी देखियो । सहकार्य र समन्वय मार्फतनै संघीयतालाई बलियो बनाउँदै समाजवादको आधार तयार पार्न सकिने तर्फ हामीले ध्यान दिन जरुरी छ ।’
नुवाकोटको बेलकोटगढी नगरपालिकाकी पूर्वउपप्रमुख ढुंगानाले आफ्नो अनुभव र अध्ययनका आधारमा सो पुस्तक तयार पार्नु भएको हो । प्रधानमन्त्री पुष्पकमल दाहालको प्रमुख आतिथ्यमा भएको कार्यक्रममा नेपाली कांग्रेसका नेता अर्जुननरसिंह केसी, संघीयता विज्ञ वालानन्द शर्मा लगायतले मन्तव्य राख्नु भएको थियो ।
